تأمين السفر: ليه مهم يكون معاك خلال رحلتك.
ليه تأمين السفر مهم ؟
تأمين السفر غير أنه بيكون مطلوب من سفارات عديدة خصوصاً للحصول علي فيزا شنجن لدول أوروبا و مؤخراً بقي مطلوب من سفارات دول أخري. هو يعتبر من أهم ضروريات السفر و بيهدف لحمايتك عن طريق تغطية مجموعة من المخاطر والحوادث الطارئة اللي ممكن تقابلك خلال رحلتك خارج البلاد و ده بيكون شئ مطمئن لكتير من الناس بتسافر و بتكون خايفة من حدوث أي شئ غير متوقع في أي وقت أثناء سفرها و خصوصا لو مسافرلأول مرة.
الفرق ما بين تأمين السفر والتأمين الصحي للسفر:
الحقيقة أن في أشخاص بيختلط عليهم تأمين السفر والتأمين الصحي للسفر لكن في النهاية التأمين الصحي للسفر يعتبر جزء من تغطيات تأمين السفر و اللي بتشمل تغطيات طبية و تغطيات لمخاطر أخري وارد حدوثها خلال الرحلات الدولية و في السطور التالية عرض لأهم التغطيات اللي بيشملها.
تغطيات تأمين السفر
- التأمين الطبى:
يشمل تغطية المصاريف الطبية اذا وقع حادث أو مرض مفاجئ للمؤمن له ، فهي بتتحمل تكاليف الاقامة والعلاج في المستشفيات بالكامل شامله العمليات الجراحية و المصاريف الخاصه بالطبيب ، و بيكون لحد أقصي موضح في البوليصة و بيتحمل أيضا تكاليف علاج الأسنان الطارئ بمبلغ بيكون محدد في البوليصة ( الحد الأقصي للتغطية بيختلف حسب مستوي البوليصة و بيكون في أكتر من مستوي في العديد من الشركات زي الإقتصادي , المتوسط و المميز و كل ما التغطية بتزيد سعر البوليصة بيكون أعلي)
نصيحة من أمان ليك : لو بتحصل علي تأمين السفر من أجل إستخراج فيزا من السفارة تأكد من قيمة الحد الأقصي للتغطية المطلوب من السفارة عشان تحصل علي بوليصة يكون الحد الأقصي لتغطياتها متناسب مع متطلبات السفارة.
-
التأمين الطبي لفيروس كورونا:
بدأت شركات التأمين إنها تغطي المصاريف الطبية و مصاريف المستشفيات اذا تم إصابة المسافر بفيروس كورونا و لكن حسب الشروط التالية:
- اصابة المؤمن له خلال رحلة السفر, وليس قبل السفر
- لازم يكون المسافر عامل مسحه قبل السفر ب 72 ساعة و تكون نتيجة العينة سلبية
- حصول الشخص علي كل الامصال الخاصة بكل دولة قبل السفر ليها
- الشروط دي بتتغير كل فترة وبننصحك بمراجعة شروط الدولة اللي مسافر ليها.
-
التأمين ضد حوادث وارد وقوعها :
مثل فقدان الحقائب في السفر أو تأخر وصولها في الوقت المناسب ، أو التعرض لسرقة الممتلكات أو فقد بطاقة الائتمان أو جواز السفر و هنا تقوم الشركة بتوفير مبلغ مالي محدد في البوليصة و ذلك لتقليل الخسائر المالية علي المؤمن له.
- تأمين إلغاء الرحلة:
يغطي المصاريف الناتجة عن إلغاء رحلة السفرلأسباب طارئة زي الحوادث او المشاكل الصحية أو سوء الأحوال الجوية حيث يعوض مصاريف الرحلة التي تم دفعها و الغير قابله للاسترداد.
- تأمين الطيران:
هو تأمين علي الحياة في حال حدوث حادث طيران جوي.
- في حالة وفاة المؤمن له:
تتحمل الشركة تكاليف نقل الجثمان بالكامل ولا تتحمل تكاليف الجنازة والعزاء ، كمان تقوم بسداد مبلغ مالي محدد في الوثيقة للورثة.
نصيحة من أمان ليك : تأكد من وجود بوليصة التأمين معاك خلال سفرك و قم بقراءة شروط الوثيقة عشان تعرف تستخدمها لو لا قدر الله إحتاجتها و كمان خلي صورة منها مع حد من أهلك.
كيفية استخراج تأمين السفر:
تأمين السفر يتم استخراجه عن طريق المجمعة المصرية للتأمين السفر للخارج فقط, وده نظام جديد تم تطبيقه في سنة 2022 وشركات التأمين الخاصة لا تصدر هذا النوع من التأمين بنفس الطريقة القديمة.
خطوات اصدار وثيقة تأمين السفر:
- الذهاب إلى اقرب مكتب جوازات والسؤال عن شباك أمان
- لازم يبقى معاك الباسبور وبيتم لصق استيكر مائي عليه بعد دفع الرسوم المطلوبه (ملصق الكتروني)
- لو محتاج تطبع الوثيقة بعد كده ممكن طباعتها من اللينك ده (اضغط هنا)
ملحوظات هامه:
- شركة "أمان" المسؤلة عن الاصدار ليس لها علاقة بموقع "أمان ليك" المتخصص في التأمين لكنه تشابه اسماء فقط.
- في حالة الحادث خارج مصر بيتم الاتصال بشركة جلوبال اسيستانس واللي رقمهم موضح في الملصق الالكتروني
- تغطية التأمين من أول عمر 1 شهر (30 يوم) حتى 85 عام.
- مدة الوثيقة سارية مع سريان جواز السفر تصل الى 7 سنوات
- لمراجعة شروط الوثيقة اضغط هنا
- لمزيد من التفاصيل عن الوثيقة ادخل على موقع المجمعة من هنا
- لطباعة وثيقة صادرة بالفعل اضغط هنا
وبكده تكون عرفنا كل المعلومات عن تأمين السفر, لو بتدور على معلومات اكتر عن انواع التأمين الاخرى زي التأمين الطبي وتأمين السيارات اضغط هنا